Rom 2 | ASO | STEP | Ido' a'mela luvoni' ne'mino ne'mine monovo goloso iga' nave muki' nene O'moso'mo lihime molo ngimika' neine' nenako nemu' evene' ma lingine evene' mamu' lihime dikeve li-ngidaa' nave muki' lingine a'mine lihime dikeve li-ngidaa' navete iga' nani' inite' goloso ne'mine nene linginesi iga' nani' nenako O'moso'mo evene' lihime ngemeline' gamenelo' nene lingine lengi' isetine izelive li-imilizani' gamazi ma minamoloseive.

Romans 2

O'moso'mo Meni Golososi Laminekisi Evene' Monovotelo' Monovotelo' Ize' Molo-ledo Lemelingumu' Paulo' Line' Gamazi

1 Ido' a'mela luvoni' ne'mino ne'mine monovo goloso iga' nave muki' nene O'moso'mo lihime molo ngimika' neine' nenako nemu' evene' ma lingine evene' mamu' lihime dikeve li-ngidaa' nave muki' lingine a'mine lihime dikeve li-ngidaa' navete iga' nani' inite' goloso ne'mine nene linginesi iga' nani' nenako O'moso'mo evene' lihime ngemeline' gamenelo' nene lingine lengi' isetine izelive li-imilizani' gamazi ma minamoloseive. 2 Ido' O'moso'mo evene' ne'mine iga' ave goni' o-ngedo lihime ngemeline' nene mo monovo lisihe' lamine' ogo lihime ngemeleseive losa gele none. 3 Gele none'za lingine nene langisetinesi a'mine monovo goloso nene ha igi mili minaa' niigisa evene' ma a'mine monovo goloso iga' navemu' ize' mili-ngidi lihime dikeve li-ngidaa' nave lingine nene O'moso'mo evene' lihime ngemelinguti' nene ha olovo' olosune li gilaa' nahe. O'ove. Olovo' ngeli mo amilisave. 4 Ido' ma nene ti' li gilaa' nahe: O'moso'mo isetine izo nasahili' o-lengede'mo ogo minaa' neine' ne'mo do akalo' o-lengedavo lutine di velepe' izi monovo goloso hulilizave losa nasahili' o-lengedaa' neingumu' nene lingine ha gililizanako gili hulisa O'moso'mo atoli'mine ogo nasahili' o-lengedo geto lihime lengemo lengebelamo isetine ize'mo vo minaa' neine' nemu' nene lingine gilavo haza nite' lolo' ogahe. 5 Evene' ma lingine lutine di velepe' izami lutine di a'manapa i'mi vi minaa' nangumu' nene O'moso aza izebolo' moloka' moloka' o'mo vo minaa' neine' nene naba o'mo vo minaa' neive. Ido' O'moso'mo monovo lisihe' lamine' e'meto evene' ize' molo-ledo lihime lemeline' gamene soto' ogavo ma a'mine izebolo' molani' votigilelo' nene do molo lihime ngemeleseive. 6 A'mine evene' ize' molo-ledeline' gamenelo' nene evene' ingine monovo goloso nehe lamine' nehe igi mili i nilizani' votigilelo' do molo meni ne'mino ngemeleseive: 7 Ve ma ingine nene O'moso'mi monovo danava lamine' goloso neine' nene dalizangumukisi ido' ninge lamine' do-ngedo do naba o-ngedeline' nemukisi ido' helamaa' ngemeni dameni dalizangumukisi nene aka vise' ogo do soto' olone li geni initeli'mi lulou' minilizahe mulumo alumo initeli'mi lulou' minilizahe nemu' nene gilami gili huli geli geli igi monovo laminekovo' igi mili minilizani' nene O'moso'mo minevo' minevo' ngemeni dameni lehize-ngedeleseive. 8 Ido' ve ma ingine O'moso biluva' i-di O'moso'mi gamazi gihile nene gili huli e'metami monovo golosolo' e'meti vi minave engikumu' nene O'moso'mo izebolo' molavo lihime atoli'mine ogo ngemeleseive. 9 Ne'mine ogavo mulumo nite' goloso ato ato' nene goloso nite' daa' avela soto' o ngemeleseive. Gana' nene Zuda vela soto' o ngemosa neloti' nene Zuda ve minamani' ato' vela soto' o ngemeleseive. 10 Ne'mine oloseine'za monovo lamineto' e'meti minaa' avela nene O'moso'mo do hozi lo do naba o-ngedo hongu lo minaa' monovo lehize-ngedeleseive. Ido' ne'mine o-ngedeline' nene O'moso aza evene' muki' nizanguti' nene linge mavo' do kegeso do lamine' o-ngedesa'mine' nenako nemu' nene Zuda ve gomu' ne'mine o-ngedosa neloti' nene Zuda ve minamani' ato' ve nesi nene ne'mine o-ngedeleseive.

12 Ido' O'moso'mo gopo hazamu' evene' linge ma do lamine' o-ngedo linge ma do goloso o-ngedesa'mive luvoni' nene nemu' noluve: Evene' ma O'moso'mo lou' gamazi've lo-ngemamivo haza minave ado' Zuda ve minamave nete lihime dalizani' nene O'moso'mo louto' do molo ize' ma molo-ngedamoloseiha nesi mo ha vi tolovo ilisave. Ido' O'moso'mo lou' gamazi've lo-ngemavo gili minave Zuda ve nene lou' di minisasi lihime dalizave nene O'moso'mo a'mine louto' do molosa ize' molo-ngedo lihime ngemeleseive. 13 Ee, O'moso'mo evene' mamu' ve lisihe' ve lo lo-ngedaa' neive nene evene' ma ingine lou' gamazi nene ha ga'inedunukovo' gilaa' avemu' nene losa'mive. Asi lou' gamazi'mo lido' iga' avevo' nene ve lisihe' ve lo lo-ngedaa' neive. 14 Ido' naza luvoni' ma nene me gililo: Zuda ve minamave ado' O'moso'mo lou' gamazi've lo-ngemavo damave ingine engi' ngemeni damenilo' di mili igi mili iliza inite' nene lou' gamazi'mo lido' vo milise' o mineline' ne'mo nene mo O'moso'mi lou' nene engi' lu'ningu' neive. 15 Ido' engi' ne'mine igi mili minaa' nani' ne'mo nene lou' gamazi'mo lo neine' gamazi lu'ningu' neine' nene do soto' ogo lelebize neive. Ingine iga' nani' initekumu' nene engi' lu'ine ga'ine ne'mo gamene ma nene di lamine' ikeve laa' ido' gamene ma nene di goloso ikeve lo lo-ngemaa' neine' nenako nemu' nene a'mine ne'mine lu'ine ga'ine engita minaa' neine' ne'mo nene naza lamine' luvoni' nene do soto' ogave. 16 Ido' O'moso'mo lavo Izesu' Kilisito' nene ezelo' medelo mino evene' laza suno' ogo molo oga' noune' inite' ize' molaline' gamenelo' nene neni' mene noluvoni' ne'mino mineleseive. Ee, naza gamazi lamine' lo soto' soto' oga' nouvoni' ne'mo nene a'mine gamazi mene lo soto' neive.

O'moso'mi Evenele Gihile None Laa' Ave Zuda Ve Nene O'moso'mi Evenele Gihile Minaali'mi Monovo Paulo' Lo-ngimine' Gamazi

17 Ido' gaza Zuda ve nolinive nene gelezo. Zuda ve nouve losa O'moso'mi lou' gamazi Mose' gizo limine' ne'mo nene O'moso'mo goni' o-ledelinguti' nene ha do nu' izeleseive lo gelo a'mido' gele medele mino okonga do dizo O'moso'mi evenele nouve laa' nane. 18 O'moso'mi lou' gamazi nene apize gimikevo gele naine' nenako nemu' nene O'moso'mo gei' iline lo lulou' gele neine' nene gaza mo ningo gelosa monovo ma ivile' ogo monovo lamine' gehepeve nene do kegeso ningaa' nane. 19 Ne'mine anidi'mo nene gaza ti' lo laa' nane: Mose' gizine' lou' gamazi nenita neingu' nene gamazi monovo vaikisi gamazi gihile lamine' vaikisi neivosa nene naza lu'ine'mi vele likavo nizave aka ngelebizelodo' mino liti'musou' minave neti livi'ine ne'mine mino ido' gamazi gilamave ngele'mize hehe lolodo' mino mono' gilami izipe ngomo ne'mine minave inite' apize ngemaa' olodo' mo lisihe' o nouve lo amuzo molo gelaa' nane. 21 Nemu' nene gaza evene' ma apize ngemaa' naine' gamazilo' nene geikisi gele dalinako gele dosa'mane. Ee, gaza gumine amozo lo evene' lo-ngemaa' noogosa gaza nene gumine oga' noolosane. 22 Ido' vene' vemoho' lili' ikeni' nete vene' vemoho' masi gopo ingamilo laa' noogosa gei' nene ne'mine oga' noolosane. Gaza soza o'mosomu' nene muso gaka dizavo olovo' oga' noogosa soza o'mosoliti numunguti' inite' gumine oga' noolosane. 23 Ido' gaza O'moso'mi lou' gamazi nene gele nouve lo okonga do dizaa' nanive neke nene a'mine lou' nene avuto' ogosa O'moso'mi gulive do lemaa' noolosane. 24 Ne'mine noluvoni' nene mono' godolou' gamazi ma ti' li gizi nizani' nene lengito' vo davosa noluve:

Zuda ve lengi' monovotine nene heta ato' ve ingine ningisa
O'moso nene divi ledivi' iga' nave.
25 Zuda veti okodido' O'moso'mi noso mili-lingidaa' nani' ne'mo nene lingine O'moso'mi lou' gamazilo' e'meti minilizani' nene mo hize ele' o-lengedeleseive. Ido' okodida O'moso'mi noso neivo mini lou' gamazi avuto' igi minilizani' ne'mo nene O'moso'mi noso lengita neine' ma nene haza nite' lolo' ogavo nomivo nizani' geleleseive. 26 Ne'mine o neine' nenako ve ma ingine oko'nida O'moso'mi noso nomivo nilizadite O'moso'mi lou' gamazi gili di minaa' niilizani' nene O'moso'mo gilivo ei' noso've nene mo engi' oko'nida mineleseive. 27 Ido' ve ma oko'nida O'moso'mi noso nomivo mini O'moso'mi lou' gamazilo' e'meti osu' lilizadite nene lengi' mono' godolo di minisasi ido' O'moso'mi noso okodida mili-lingidikevo minisasi O'moso'mi lou' gamazi avuto' iga' nave lengi' nene losuvotine ilavo monovotine nene soto' oloseive. 28 Ee, O'moso'mi evenele gihile Zuda ve minaa' ne'mi gihile nene okode losuvoloti' nene ma soto' osa'mive. Ido' a'mine'mine ogo O'moso'mi noso do minaa' ne'mi gihile nene O'moso'mi noso ve li okode lolovo huki hulaa' nadoti' nene ma soto' osa'mive. 29 Asi O'moso'mi evenele Zuda ve minaa' ne'mi gihile nene luteu' haleko minine' lemeni dameniloti' nene soto' oga' neive. Ido' O'moso'mi noso gihile nene lou' gamazi gizi nizado' nene ha okode losuvoloti' e'meto okode lolovo huko hulaa' neve nene nevoba asi O'moso'mi Sikalahu' ne'mo luteu' molo-ledaa' neine' lemeni dameni nene neive. Ne'mine lemeni damenisi Zuda ve gihile minelonivemu' nene evenelite lopo'ni lilizavoba asi O'moso'mo loloseive.